Kalinnews

වසර 9කට පෙර එරියානා ඇෆ්ගන් ගුවන් සමාගමට අයත් එයාර් බස් මගී ගුවන් යානාවක් මගින් 100ක් සමගින් ඇෆ්ගනිස්ථානයට ඉහළ අහසේ පියාසරන මොහොතකදී ජර්මානු නියමුවන් රහිත ඩ්‍රෝන යානයක් සමග ගැටී සිදුවන්නට ගිය මහා විනාශයක් වැළකී ගොස් ඇතැයි හෙළිදරව් වී තිබේ.

EMT ලූනා X-2000 වර්ගයේ පිරික්සුම් ඩ්‍රෝන යානාවක කැමරාවේ සටහන්ව තිබූ වීඩියෝවක් යූ ටියුබ් හරහා ජනප‍්‍රිය වීම සමග මේ සිදුවීම කරළියට පැමිණ ඇති අතර මගි ප‍්‍රවාහන ගුවන් යානයේ වම් තටුවට මීටර කිහිපයක් නුදුරින් ඇදී ගිය ඩ්‍රෝන යානය කැළඹුම් වාත ධාරාවන්ට හසුවී කාබුල් අගනුවරට ඇද වැටී තිබේ.  ජර්මානු ආරක්ෂක ඇමති තෝමස් ඩි මෙසියර් විසින් ජර්මනිය සතුවූ පැරණි ඩ්‍රෝන යානා ඉවතලමින් ක‍්‍රියාත්මක කරන්නට සැලසුම් කර තිබූ ඩොලර් මිලියන 652ක් වටිනා යුරෝහෝක් වැඩසටහන අවලංගු කිරීමෙන් සතියකට පසුව මෙය වාර්තා වී ඇත.

නේටෝ සංවිධානයේ ග්ලෝබල් හෝක් ව්‍යාපෘතිය යටතේ ක‍්‍රියාත්මක වූ යුරෝහෝක් වැඩසටහන මගින් ජර්මනිය ඇමරිකානු නෝත්‍රෝප් ගෲමන් සමාගම විසින් නිෂ්පාදිත RQ-4B ඩ්‍රෝන යානාවක් මිලදී ගනු ලැබූ අතර තවත් යානා 4ක් මිලදී ගැනීමට සැලසුම් කර තිබිණි.  නමුත් ගැටුම් වළකන තාක්ෂණික පද්ධතියක් සවිකිරීමෙන් තොරව යුරෝපා අහසේ මෙම ඩ්‍රෝන යානා සැරිසරන්නට අවසර නොමැති බව පැවසූ මෙසියර් එවැනි පද්ධතියකින් පවා ආරක්ෂාව සහතික කළ නොහැකි වීමත් එමගින් පිරිවැය අධික වීමත් නිසා මෙම තීරණය ගත් බව පවසන ලදී.

නමුත් ව්‍යාපෘතිය අසාර්ථක වන බව මාස 15කට පෙර දැනුම් දී තිබූ බව ආරක්ෂක අමාත්‍යාංශ වාර්තා හෙළිදරව් කිරීම සමගින් කඩිනම් පියවර නොගෙන ජනතා බදු මුදල් නාස්ති කර දැමූ බවට ඇමතිවරයාට එල්ල වී ඇති විවේචනයට කරුණු පැහැදිලි කිරීම සඳහා ඔහු මේ සතියේදී ජර්මානු පාර්ලිමේන්තුව අමතනු ඇතැයි වාර්තා වේ.

ඞී.එම්.කේ.පක්ෂ නායක එම්.කරුණානිධි එරට මධ්‍යම රජයෙන් ඉල්ලීමක් කර ඇත්තේ ඉන්දියාවේ වෙසෙන ලක්ෂයකට අධික ශ්‍රී ලාංකික සරණාගතයින්ට ඉන්දීය පුරවැසිභාවය ලබාදෙන්න ලෙසයි. ඉන්දීය මාධ්‍ය වාර්තා පවසන්නේ ඔවුන්ගේ අනාගත සුරක්ෂිතභාවය තහවුරු කිරීම සඳහා මෙම ඉල්ලීම සිදු කළ බව කරුණානිධි පවසා ඇති බවයි..

තමිල්නාඩුව පුරා කඳවුරු 112 ක ශ්‍රී ලාංකික දෙමළ සරණාගතයින් ලක්ෂයකට අධික සංඛ්‍යාවක් රඳවා සිටින බව ඉන්දීය මාධ්‍ය සඳහන් කරයි.

‘ඇමෙරිකා එක්සත් ජනපදය එරට සිටි ලක්ෂ දෙකහමාරක් පමණ වූ ඉන්දීය සරණාගතයින්ට අදාළ වාර්තා නොමැතිවම එරට පුරවැසිභාවය ලබාදුන්නා. ඒ ආකාරයෙන්ම මෙරට සිටින ශ්‍රී ලාංකික දෙමළ සරණාගතයින්ට මෙරට පුරවැසිභාවය ලබාදී ඔවුන්ට ස්ථීර ආරක්ෂාවක් සැලැස්විය යුතුයි. අපි මධ්‍යම රජයෙන් ඉල්ලන්නේ එයයි. එම ජනතාවගේ අනාගත සුරක්ෂිතතාවය සලසන්න කියලයි’ කරුණානිධි වැඩිදුරටත් මාධ්‍ය හමුවේ පවසා ඇත.

ජාතික විදුලි පාරිභෝගික ව්‍යාපාරය මේ වසරේ පළමු මාස 04 තුළ ඇතිවූ වර්ෂා තත්ත්වය නිසා විදුලිබල මණ්ඩලය ජලය උපයෝගී කරගෙන විදුලිය නිපදවීමේ අපේක්ෂිත ඒකක ප‍්‍රමාණයට වඩා විදුලි ඒකක ප‍්‍රමාණයක් නිපදවාගෙන තිබෙන බවත්, එහි වටිනාකම රුපියල් බිලියන 17 කට අධික බවත් ජාතික විදුලි පාරිභෝගික ව්‍යාපාරයේ උපදේශක බන්දුල චන්ද්‍රසේකර මහතා සඳහන් කළේය.

මේ වසරේ පළමු මාස 04 තුළ ජල විදුලියෙන් නිපදවීමට බලාපොරොත්තු වූ ඒකක සංඛ්‍යාව ගිගාවොට් පැව 710 ක් බවත් එහෙත් ඇතිවූ වැසි තත්ත්වය නිසා මෙම මාස 04 තුළ ගිගාවොට් පැය 1662 ක් නිපදවා තිබෙන බවත්, එලෙස නිපදවීමේදී අපේක්ෂිත ඒකක ප‍්‍රමාණයට වඩා විදුලිය නිපදවීම නිසා මෙම මුදල උපයාගෙන තිබෙන බවත් ඔහු කියා සිටියේය.

මේ නිසා මෙහි වාසිය ඒකක 60 සිට 180 දක්වා විදුලිය පරිභෝජනය කරන ජනතාවට ලබාදෙන ලෙසද උපදේශකවරයා සඳහන් කළේය.

මේ වසර තුළදී ජල විදුලිය උපයෝගී කරගෙන ගිගාවොට් පැය 2828 ක් නිපදවීමට අපේක්ෂා කළත්, ඇතිවූ වැසි තත්ත්වය නිසා එම ප‍්‍රමාණය ගිගාවොට් 4000 කට අධික වන බවද ඔහු ප්වසා සිටියේය.

තැලසීමියා රෝගීන් දිවයිනේ වැඩිම පිරිසක් සිටින්නේ වයඹ පළාතේ බැවින් 2020 තැලසීමියාවෙන් තොර වයඹක් යන තේමාව යටතේ තැලසීමියාව තුරන් කිරීමේ ව්‍යාපෘතිය වයඹ පළාත් සෞඛ්‍ය අමාත්‍ය අශෝක වාඩිගමංගාව මහතාගේ අදහසකට අනුව 2008 වසරේදී ආරම්භ කරන ලදි.

ඒ අනුව එම ව්‍යාපෘතිය වයඹ පළාත් සෞඛ්‍ය සේවා අධ්‍යක්ෂ වෛද්‍ය ආර්.එම්.එස්.කේ. රත්නායක මහතාගේ මෙහෙයවීම යටතේ ක‍්‍රියාත්මක කරනු ලැබීය. මෙම අරමුණු සඳහා රාජ්‍ය සහ පෞද්ගලඉක අංශයෙන්ද පාසල් සිසුන්ගේ දායකත්වයෙන්ද විශාල වශයෙන් මුදල් සහ භාණ්ඩ පරිත්‍යාග වශයෙන් ලැබී ඇත.

ඉන්පසුව මෙම අරමුදලේ අරමුණු ඒ ආකාරයෙන් ක‍්‍රියාත්මක නොවී තැලසීමියා රෝගීන්ට කිසිදු ප‍්‍රතිලාභයක් නොලැබීම සම්බන්ධයෙන් මහජන පැමිණිලි රැුසක් ලැබීම නිසා ඒ සම්බන්ධයෙන් විගණන පරීක්ෂණයක් පවත්වන ලෙස වයඹ සෞඛ්‍ය අමාත්‍ය අශෝක වඩිගමංගාව මහතා නියම කළේය. මේ අනුව වයඹ පළාත් අභ්‍යන්තර විගණන දෙපාර්තමේන්තුව මගින් 2010 වසරේදී පවත්වන ලද විගණන පරීක්ෂණයෙන් අනාවරණය වී තිබුණේ තැලසීමියා අරමුදලේ මුදල් විනිවිදභාවයෙන් තොරව වියදම් කොට ඇති බවය.

මෙම අරමුදලේ සිදුව ඇති බොහෝ ගනුදෙනු සැකයට තුඩුදෙන අවිධිමත් ගනුදෙනු බවත් මිලදී ගැනීම සහ ප‍්‍රදානය කිරීම් සඳහ ව්‍යාජ ලියවිලි ඉදිරිපත් කර ඇති බවත් එම විගණන පරීක්ෂණයේදී අනාවරණය කරගෙන තිබිණි.

13 වැනි ආණ්‌ඩුක්‍රම ව්‍යවස්‌ථා සංශෝධනයට අනුව උතුරු පළාත් සභා මැතිවරණය පැවැත්වීම තුළින් රටේ ඒකීයභාවයට තර්ජනයක්‌ ඇතිවිය හැකි බව රාජ්‍ය ආරක්‍ෂක ලේකම් ගෝඨාභය රාජපක්‍ෂ මහතා පැවසීය.

ඉඩම් සහ පොලිස්‌ බලතල සහිතව පිහිටුවනු ලැබූ පළමු උතුරු පළාත් සභාවේ අත්දැකීම් සිහිපත් කළ යුතුව ඇතැයි ද පැවසූ ආරක්‍ෂක ලේකම්වරයා බෙදුම්වාදී පිරිස්‌ වෙත උතුරු පළාත් සභාවේ බලය හිමි වුවහොත් ඉන් රටේ ඒකීයභාවයට ඇතිවන බලපෑම් පිළිබඳව පුළුල් ලෙස සාකච්ඡා කළයුතු බව ද කීවේය.

කොටි ත්‍රස්‌තවාදය පරාජය කර උතුර මුදාගැනීමේදී අපේ හමුදාව විශාල කැපවීමක්‌ සිදුකළා. එසේ කැප කර ලබාගත් ජයග්‍රහණය බෙදුම්වාදීන් අතට යන්න දෙන්න බැහැ. ඒ නිසා 13 වැනි ආණ්‌ඩුක්‍රම ව්‍යවස්‌ථා සංශෝධනය ගැන අපි පුළුල්ව සාකච්ඡා කළයුතු බව ද ඒ මහතා වැඩිදුරටත් පැවසීය.